Die Kiersche
Et es schon länger als vierzig Johr her, on alles en Hoschem wor noch e besje annerst als heut. Awer manches em Lewe vergißt mer net, egal wie alt mer wird. Su war dot och met denne Kiersche. Mir wore, wie su oft, Sonntags nohmittags an de Rhein schwimme gegange. Et wor dohmals unser Sonntagsvergnüje, do hat sich die ganze Hoschemer Jugend getroff. Wo sollt mer och hingin, et goth noch kei Disco, on Geld hatte mer och keins. Et gohf zwar bei Ries Sonntags Kino, dat hat nur 1 Mark gekost, awer die hatte mer och net emmer.
Jedenfalls han mir iwwerlähscht, wat mer noh dem Schwimme noch anstelle könnte. Doh meint dö Robert, meine heutige Schwager: „lch weiß, wo schöne Kiersche stinn. Wer gieht met, Kiersche klaue?“. Dat Streichs Gertrud, dä Brümmendorfs Rolf, dä Stolle Robert on ich han uns dann verabred. Also heim, omzehe on ab dä Berg eroff bes off die Wiss onner dem Altenberger Hof.
Doh stonde wirklich Kiersche wie gemohlt – deck on schwarz. Mir wohre noch net ganz on dem Boum dron on wollte onfänge ze plücke, doh schreit dat Breidbachs Emma aus dem nächste Heck: „Pitter, mir hann se – hei senn se“ Du lewer Gott, doh wohre vor uns schon annere an denne Kiersche, on die Breidbachs loche jetzt off der Lauer, om die ze erwesche. Dohbei wore mir doch wirklich et ihrschte Mol doh ohwe.
Mir senn ab, jeder in en annere Richtung, nur fott. Mir senn gerannt om unser Lewe. On ich hatt mein ihrschte Pumps on, weiße Leineschoh mit kleine Absätz dron, on dozoh e weiß Leinejäckche, dat hatt die Tante mir aus nem Betttohch genäht. On dohmet ben ich mette em Altenberger Hofer Wäldche in en Bombetrichter gefalle, die gohf et dohmals nämlich noch iwweroll.
Jedenfalls ben ich doh dren leije gebliwwe, plott off dem Bauch, bis et dunkel wohr. Noch emmer wohr von weitem dem Breidbachs Pidder sein Stemm ze hiere: „Wenn ich die krehn, ich schlinn se kapott!“ An Arm on Bein zitternd, bin ich wirklich of Hänn on Föhß durch e Kornfeld gekroch on vill ze spät heimkomme. Die Schoh kapott on dat Jöckche dreckisch, von denne drei onnere honn ich nix mie gehiert on gesehn. Awer wot e Glück, Vadder on Modder wohre beim Ries em Kino!
Die Uma hat mir die Dür offgemacht on versproch, nix ze verrohte. Se wollt mir sugar dat Jäckche wäsche, die gohde Frau – die wohr och später noch öfter mein Verbündete. Jedenfalls ben ich ganz erlöst en mei Bett gefalle, su gohd hann ich lang net mie geschlohf. Meiner Modder hann ich annere morjens irjendwat erzählt. Gott sei Dank, dat wohr noch e mol gohd gange.
Denkste: Als ich ohmends von der Arbeit heim kahm, ich war ja dohmols schon in der Lier, sass meiner Modder ihr Freundin bei ons en der Küch. Doh soht die ganz scheinheilig: „Weißt de, Maria, em Dorf erfährt mer su manches. Doh hätte gester ohmend doch e paar junge Leut dem Emma die Kiersche geklaut, se wären sugar erkannt wohrel” Dohbei guckt die mich an on grinst.
Mieh hat die net gesoht, awer mei Modder hat direkt geschalt, dräht sich om und haut mir e paar rechts on links henner die Uhre. Su schnell konnt ich gar net gucke! Die hat nie lang gefackelt, ons Modder. Su klein dat Marie och es, et hat emmer en gohde Handschrift gehat. Awer der ihr Freundin hätt ich könne vergifte, dat hann ich der lang net vergeß. On Kiersche han mir dohnoh trotzdem widder geklaut.
Die Lederbohx
Wat ich hei erzähle, wor etliche Johre später. Och su e Steckelsche Erinnerung, wo mer oft dran zereckdenkt. Vor allem, weil dat heut ze Daach garnet mie möchlich es. Wer gieht dann heut noch en dä Rhein schwimme? Jedenfalls wore mir sonndaachs ohmends ihrscht bei de Ries en et Kino, en Film gucke. Anschließend sen mir dann meistens en der Wirtschaft beim Ehle geland. Doh kom dann emmer en ganze Klique zesamme. Su wor dat och an dem besaachte Ohmend, et wor en dolle Stimmung.
Noh etliche Biercher hat dann einer die Idee gehat: „Auf, mir giehn jetz all en de Rhein schwimme – nackisch!” Mensch, wie romantisch, naachts om 12 Uhr, bei herrlichem Wetter, on dann noch nackisch. Dat mohß mer erlehft hann. Die ganze Bande wor helloff begeistert. Ich glauwe, dat wor dä ruht Karlins Häns, dä heut en Schottland lehft, dä die Idee gehat hat. Awer bitte, alles wor ganz sittsam: Männlein on Weiblein schön getrennt on eren en dat Wasser.
Wie mir grad all dren wore, kimmt doh en einsame Gestalt dat Treppche ronner on guckt vorsichtig hin on her. Mir han schon Angst gehat, dat wären Spanner. Doh marschiert dä – wie e wor – en voller Mondur en et Wasser. Dat wor dä Stolle Robert. Dä wor ons nohkomme, awer ä woßt jo net, dat mir all nackisch wore. Meine Robert stand nau mit ner lederne Seppelbohx bis iwwer die Trähjer em Rhein. Mir hann Träne gelacht: die Bohx es emmer länger wore, dat leder emmer härter. Meine Robert woßt garnet mie, wie ä die Bein stelle sollt! Mir lache als heut noch dohdrüwwer!
Deheim hat dä Robert die Bohx en de Keller gehängt, die hat dä nie mie angehat. Ich glauwe, dem sei Modder weiß bes heut noch net, wot met der Bohx possiert wor! Vielleicht liest se joh die Geschicht. Awer heut, mit fast 60 Johr, kann dem Robert joh nix mie passiere!